Föstudagurinn langi

Þegar ég var barn var föstudagurinn langi mjög langur. Einhvern veginn komst maður þó í gegnum hann, í minningunni aðallega með því að hafa ofan af fyrir sér sjálfur með kubba- eða barbieleik.

Á unglingsárum lokaði maður sig inni í herbergi og hlustaði á tónlist af kassettum eða grúfði sig ofan í bók. Seinna meir fór maður í ferðalög með kristilegu starfi en svo á eigin vegum til dæmis í bústað og þeyttist um allar trissur.

Í dag kann ég að meta friðinn sem fylgir dymbilviku. Það er þó ekki svo að hér sé látlaus friður, nei, nei, ég heyri óm frá bíómyndum og tölvuleikjum en svo inn á milli fellur allt í dúnalogn og allir að slaka á hver á sinn máta.

Friðarkveðja

XXX

 

Posted with Blogsy

Vorboði

Fyrir 14 dögum fengum við Litlimann þá grillu í höfuðið að sá fræjum fyrir sumarið. Við keyptum okkur fræ í Garðheimum (á útsölu) og nýttum sunnudagskvöldið í að koma þessu fyrir. Við settum baunir, blóma- og kryddfræ niður til að byrja með. Litlamann finnst þetta spennandi. Hann hefur verið mjög samviskusamur að vökva á hverjum degi þegar hann kemur heim eftir skóla. 

Og núna lítur stofuglugginn minn svona út. Lofar góðu.

Baunagras

Butterfly Blues Cornflowers

Þar til næst

XXX

Vor í lofti

Ég var að ljúka við sokka en uppskriftin er úr bókinni Sokkaprjón. Ég notaði Kambgarn en prjóna nr. 2,5. Gerði einnig úrtöku á tá á hliðum, finnst ekki passa að nota hvirfilúrtöku í sokka, amk. ekki á þessu pari.

Er að prjóna húfu á mig núna. Er alltaf að ruglast í mynstrinu svo að ég þarf að taka pásu eftir tvær umferðir og telja reglulega.

Annars hafa dagarnir gengið sinn vanagang. Hef verið óvenjulega þreytt og bara lagt mig þegar ég hef komið heim úr vinnu. Drattaðist þó í að baka bananabrauð einn daginn. Jummí, besta uppskriftin að bananabrauði hingað til. http://grgs.is/2013/11/13/bananabraudid-sem-bornin-elska/

 

 

Það líður samt að páskum, hlakka svo til vorsins :)

 

Þar til næst

X

 

 

 

 

Posted with Blogsy

Vor í lofti

Mars 2015. Allt ætlar um koll að keyra vegna sólmyrkva. Enginn ætlar að missa af þessu náttúruundri, sem flest okkar náum kannski að sjá einu sinni á mannsævinni. Já, flott en svo bara búið. Flestir hoppa upp í bílana sína, setjast við tölvuskjáinn og missa síðan af daglegum undrum náttúrunnar sem eru alls ekki síðri en myrkur í algeimi.

Veðrið heldur áfram að vera "allskonar" sem hefur gefið tækifæri til snjóhúsagerðar en síðan voru hjólin tekin fram tveim dögum seinna eftir vetrardvöl í bílskúrnum.

Við Litlimann skelltum okkur líka í Húsdýragarðinn til að fylgjast með rúningu kindanna.

Bara yndislegt.

x

Síðan síðast

Litli mann fékk hlaupabólu og það ekkert smávegis. Hann var meldaður veikur í 8 daga. Blessunarlega hefur hann verið heilsuhraustur hingað til en þessi veikindi tóku hraustlega á, úthaldið hjá honum var ekkert á áttunda degi en það er allt að koma.

Prinsessa #2 er alltaf að selja eitthvað til að safna í sundmótasjóðinn sinn. Nú síðast var hún að selja kartöflur, svo að hér hafa verið kartöflur í öll mál. Soðnar, kryddaðar, franskar, kartöflumús og síðast en ekki síst bökuð kartöflumús í ofni. Mmmm...

Öðru hverju er ég beðin um að skrautskrifa í bækur og kort. Það er alltaf jafn skemmtilegt en vinnan er mikil á bak við eitt kort. Ég vona bara að þiggjandinn kunni að meta það.

Ég var búin að einsetja mér að komast í bústaðinn eitthvað um páskana og það tókst. En það er lítið frí og afslöppun í því. Í vetur byrjaði ofn í stofunni að leka en sem betur fer er bústaðurinn svo illa einangraður í gólfinu að vatnið rann bara í gegn - já stundum er gott að byggt var af vanefnum fyrir 30 árum.

En semsagt...

...við skötuhjúin hjálpuðumst við að koma upp nýjum ofni ogLitlimann þvældist fyrir aðstoðaði á hliðarlínunni.

En meðan húsbóndinn dundar við að dytta að bústaðnum fer ég í gönguferðir um nágrennið. 

Þessa þrjá daga sem við dvöldum var yndislegt veður, hitinn um 5°c en vindkælingin var svolítil - reyndar brunakuldi þegar komið var upp á hól...

en vel þess virði þegar á toppinn er komið.

Biskupstungur 2013

Eftir að rafmagnið kom í bústaðinn er gott að geta setið á kvöldin við rafmagnsljós og lesið já eða prjónað. Ég lauk við þessa litlu nýburapeysu en þegar kemur að velja tölur fyllist ég alltaf valkvíða.

En þetta varð lokaniðurstaðan. 

Peysan er prjónuð frá hálsmáli niður og uppskriftin er fríkeypis á Ravelry sem nýburapeysa. En það er hægt að nálgast hana í stærri stærðum gegn nokkurra $ greiðslu.

En þar til næst þá hef ég augu mín til fjallanna...

Vordagur tvö

Ég var að leggja lokahönd á óróa í dag...

...og er svo sátt við útkomuna. Óróinn færir einhvern veginn sólina inn í stofu.

Hugmyndina fékk ég úr bók Edie Eckman. 

Ég á þegar þrjár bækur eftir hana og þær eru allar svo fallegar.

Vordagur

Umm,já. Vor í lofti. Nú skal koma vor eftir páskahretið í vikunni. 

Eldhúsborðið fyllist af allskonar dótaríi. Ég hekla núna sem aldrei fyrr.

Bókin sem er oftast opin þessa dagana og liggur á borðinu heitir Connect the Shapes, crochet motifs . 

Þessi bók er brjálæðislega falleg. Mæli hiklaust með henni.

Litlimann er auðvitað sjálfskipaður sérlegur aðstoðarmaður og ráðgjafi. 

Hann er á fullu þessa dagana að æfa sig í fínhreyfingum og perlur og litabókablöð um allt hús.

Hann gerir mann stundum alveg brjál !!!

Hann tók t.d. alveg upp á sitt einsdæmi að skreyta stofuna...

...en hver stenst þetta litla rófuskott?

Heklaðgraff

Ég var búin að heyra utan af mér að það væri í tísku að graffa hekl út um allan bæ.

Þetta graff er í garðinum við Ásmundarsafn í Reykjavík.

En graffið var ekki það sem stóð upp úr, þó að það væri sérstakt og flott , heldur Ásmundarsafnið sjálft.

Ég varð barasta alveg heilluð. Sýningin innandyra er sko vel heppnuð.  Sýningarskráin sem ég fékk við innganginn er með þeim flottari sem ég hef fengið. Ég fór heim, las hana vel yfir og langaði til að vita meira um þennan merkilega listamann. Að mínu mati eiga söfn að vera þannig, þ.e. þau veki forvitni og að mann langi til að koma aftur og sjá meira.

Litlimann átti reyndar erfitt með að halda að sér fingrum innandyra en úti í garðinum er hægt að príla og koma við listaverkin að vild. Svo vorum við með nesti og teppi með okkur og í garðinum eru fínir bekkir til að fá sér piknik. Það er eitthvað svo spennandi að hafa með sér nesti og borða úti í stórborg.

Fjöruferð

Vorhugur í fólki sem veldur því að maður skellir sér í fjöruferð. Vorið var nú samt ekki meira en svo að á 15 mínútum vorum við orðin holdvot inn að beini og litlir fingur ísskaldir. Fundum fjóra litla kuðunga og bíldekk. Við drifum okkur beint heim og hituðum heitt súkkulaði og mauluðum kleinur með.

En þörf fyrir útiveru var ekki fullnægt hjá litla manni svo að hjólið var dregið fram úr skúrnum en um leið dró ský frá sólu.  Bongóblíða á pallinum.  Dæmigert.