Föstudagurinn langi

Þegar ég var barn var föstudagurinn langi mjög langur. Einhvern veginn komst maður þó í gegnum hann, í minningunni aðallega með því að hafa ofan af fyrir sér sjálfur með kubba- eða barbieleik.

Á unglingsárum lokaði maður sig inni í herbergi og hlustaði á tónlist af kassettum eða grúfði sig ofan í bók. Seinna meir fór maður í ferðalög með kristilegu starfi en svo á eigin vegum til dæmis í bústað og þeyttist um allar trissur.

Í dag kann ég að meta friðinn sem fylgir dymbilviku. Það er þó ekki svo að hér sé látlaus friður, nei, nei, ég heyri óm frá bíómyndum og tölvuleikjum en svo inn á milli fellur allt í dúnalogn og allir að slaka á hver á sinn máta.

Friðarkveðja

XXX

 

Posted with Blogsy

Ökklasokkar

Þessir sokkar eru handa mér. 100% cascade ull, enginn gerviþráður. Það á víst að vera betra að hafa um 20% nylon/polyester til styrkingar. Við sjáum til, er á meðan er ;)

Úrtakan á tá var alveg ný fyrir mér. "Cast off kitchener stitch." Allt á youtube ;)

 

Litlimann hefur ofan af fyrir sér sjálfur þessa stundina við að búa til spil. Jamm, sambland af spilasokk með yfir 20 flettispjöldum og teningaspili. Vill einhver spila við mig?

 

Posted with Blogsy

Free spirit

Ég er að verða nokkuð klár í sokkaprjóni, svo ég monti mig aðeins. Nýja aðferðin sem ég lærði við að taka upp lykkjur á hælstalli er margfalt fallegri en sú sem ég hef gert hingað til. Engin leiðinda göt að bögga mig. Það er alltaf hægt að læra nýja tækni í prjóni :)

Annars er ég mestmegnis í almennum heimilisstörfum þessa dagana, þvo þvotta, elda og aðstoða Litlamann með heimanámið. Það getur verið heljarinnar mál stundum því hann er nú ekki á því að láta einhvern bóklestur tefja sig. Eða eins og frænka hans orðaði það: "he is a free spirit little boy."

 

 

Posted with Blogsy

Bless febrúar, halló mars

Febrúar búinn. Nóg að gera á þessum bæ. 

Litlimann óskaði eftir að vera drekatemjari á öskudaginn og það var stílfært eftir bestu getu. Hann bjó til sjálfur hálsfestina en ég fór í sölubúð Rauðakrossins og fékk þar gerviskinn fyrir 400 kall og saumaði vesti og legghlífar handa litla víkingnum mínum. Það var nokkuð sáttur drengur sem trallaði sér í skólann þann daginn. 

Litlimann hefur verið upptekinn af Loom böndum síðustu vikurnar, teygjurnar sem fást í öllum regnbogans litum og festar saman með nokkurs konar hekli. Hann þarf nú samt svolitla hjálp við þetta því þetta reynir verulega á fínhreyfingar.

Á konudaginn fékk ég þessa fínu blómvendi frá húsbóndanum. Það er lítið við það að bæta annað en: Blóm gleðja.

Fjáröflun fyrir sunddrottninguna er í fullum gangi og það verður nú að að segjast að fjáröflunarnefndin vinnur duglega að því að hafa verkefnin fjölbreytt. Fyrir utan þetta helsta að selja plastpoka eða flatkökur koma upp smáverkefni eins og að útbúa veisluhlaðborð fyrir hina ýmsu fundi. Nú var komið að mér að útbúa brauðrétt en það er eitthvað sem ég er arfaslök í. Tókst þó að útbúa laxa- og skinku tortillakökur með rjómaosti og káli. Umm, einfalt og þrusugott.

Ég hef gripið í handavinnuna þegar færi gefst en tekst einhvern veginn samt ekki að klára neitt. Fékk skyndilega þá flugu í höfuðið að prjóna á mig peysu. Þyrfti svo mikið á henni að halda í nýju vinnunni minni. Jebbs, byrjuð að vinna aftur fyrir utan heimilið. Kannski ekki skrýtið að verkefnin sitja á hakanum...

þar til næst

x

Skin og skúrir

Loksins, loksins, loksins komin í sumarfrí. LOKSINS.

Eftir viðburðaríkan og strembinn vetur er ég kominn í sumarfrí...

...eða sko frá launuðu vinnunni. Það er síður en svo lognmolla á þessum bæ.

Eins og ég hef áður minnst á þá erum við stoltir hluthafar í sumarbústað. Og honum þarf að sinna. Það er alltaf eitthvað, nú var drifið í að ganga frá framkvæmdum síðasta sumars þ.e. að tengja nýja rotþró. Auðvitað er Litlimann ekki langt undan að taka út verkið.

Svo þarf að tyrfa yfir allt saman. 160 fermetrar. Fjögur bretti af torfi. 30 hjólbörur af möl og mold flutt til.

En margar hendur vinna létt verk.

Af sjálfsögðu var verkið tekið út af Litlamann...mér sýnist það vera þumlar upp!

Í bústaðnum er líka einhvern veginn alltaf tími fyrir þetta "allt annað"

En það skiptist á skin og skúrum. Í þessum mánuði kvöddum við góðan mann sem háði baráttu við krabbamein. Nágranni, fjölskyldufaðir, dugnaðarforkur, ávallt tilbúinn að rétta hjálparhönd og síðast ekki síst með rólyndisgeð sem öllum leið vel nálægt. Hans verður sárt saknað.

En svo skín sólin aftur. Sama dag og jarðarförin var fengum við skilaboð um að í heiminn væri komin litil stúlka. Svo agnarsmá. Fædd fyrir tímann. Ég orðinn frænka á nýjan leik. Bara yndislegt.

Við höldum ótrauð áfram...

Framundan er AMÍ sundmótið sem er búið að stefna að í marga mánuði. Undirbúningurinn hefur verið nokkuð strangur og við hjónin skiptumst á að mæta á foreldrafundi og "undirbúningsmót." Bóndinn er áhugasamari og orðinn sunddómari en ég læt duga að sitja á bakkanum og sjá til þess að fylla á ísskápinn.

Nú þarf bara að finna nýja spennandi handavinnu sem hægt er dunda við á milli verka sem sundfararstjóri. 

Haltu áfram að læra svo lengi sem þú lifir

Börn eru frábær í þessu, að læra eitthvað nýtt. Ég fór með Litlamanni í sveitaferð með leikskólanum hans. Oh, hann var svo spenntur. RISA stór rúta, meira að segja tvær, fór með okkur á vit ævintýranna. Þetta var allt svo spennandi. Þegar í sveitina var komið voru dýrin skoðuð fyrst...

hundurinn og hænurnar voru svolítið spennandi...

en það var ekki það sem þurfti að kanna sérstaklega heldur bæjarlækurinn...

"Hvað er nú þetta eiginlega?" 

Ég hef verið líka í minni eigin könnunarferð í hekli og prjóni. Eiginmaðurinn spurði mig hvað ég væri að búa til. "Ég hef ekki hugmynd um það" svaraði ég. Ég hef ekki verið að búa til eitthvað sérstakt, bara að gera prufur. Og það er þrennt sem ég er búin að læra:

1. Hekla saman dúllur án þess að klippa á garnið. Það var rökrétt afleiðing að læra það eftir raunir mínar með alla endana með síðasta teppi sem ég gerði. 

2. Fitja upp lykkjur fyrir prjón með heklunál. Tja, það var bara eitthvað sem ég rakst á þegar ég var að vafra á veraldarvefnum og varð bara að prófa.

Þetta gula stykki er afrakstur þeirrar vinnu. 

Algjörlega tilgangslaus tuska en gæti orðið grunnur að einhverju meira. Kannski trefill? Eldhúsgardína? Pils? 

3. Tvíbandprjón. Já, ég skellti mér að námskeið eina kvöldstund með nokkrum áhugakonum (eða svona meira pró!) af Suðurnesjum um prjón. Ég var pottþétt með minnstu reynsluna af prjóni þarna og viðurkenni fúslega að þetta var strembið. Og nú er bannað að fara að hlæja að stykkinu sem gert var á ÞREMUR klukkutímum...

Fram eða...

...aftur

Sko, þetta er sama stykkið, en báðar hliðar  sléttar.  Ég hef ekki hugmynd um  til hvers ég ætla að nota þessa færni heldur en skítt með það. Það er bara svo gaman að læra eitthvað nýtt.

Vordagur

Umm,já. Vor í lofti. Nú skal koma vor eftir páskahretið í vikunni. 

Eldhúsborðið fyllist af allskonar dótaríi. Ég hekla núna sem aldrei fyrr.

Bókin sem er oftast opin þessa dagana og liggur á borðinu heitir Connect the Shapes, crochet motifs . 

Þessi bók er brjálæðislega falleg. Mæli hiklaust með henni.

Litlimann er auðvitað sjálfskipaður sérlegur aðstoðarmaður og ráðgjafi. 

Hann er á fullu þessa dagana að æfa sig í fínhreyfingum og perlur og litabókablöð um allt hús.

Hann gerir mann stundum alveg brjál !!!

Hann tók t.d. alveg upp á sitt einsdæmi að skreyta stofuna...

...en hver stenst þetta litla rófuskott?

Steypiregn

Til að fá regnboga þarf rigningu. 

 Og útrúlegt en satt segir maður bara LOKINS. Þetta var alveg orðið fínt af þurrki. 

En mikið er Litlimann þurftafrekur, hann á enn erfitt með að hafa ofan fyrir sér sjálfur. Ég held að ég sé búin að finna upp á öllu sem fylgir því að skemmta 3 ára trítli.

En til allrar hamingju þurfa litlir menn að hlaða batteríin... og þá fær skemmtikrafturinn smá pásu.

Hvítasunna

Sumarið er komið, og hvað er betra en íslensk sveitasæla?

Hitinn fór upp að 22°c í skugganum , bara dásamlegt. 

Eftir að við tókum inn rafmagnið í bústaðinn er hægt að leyfa sér ýmislegt sem ekki hægt var áður. Baka vöfflur er eitt af því, og auðvitað var Litlimann með vökult auga á öllum framkvæmdum.

Og svo var svo skemmtilegt að týna upp "blómin sem eru út í beði" en honum fannst furðulegt hvað þau voru fljót að "sofna aftur" þ.e. þau fölnuðu ;-)

Eftir að Litlimann var sofnaður fór ég í gönguferð um sveitina ásamt prinsessu #2 og nú er hægt að kaupa egg beint frá bóndanum. Ooh , það er svo gaman, ganga yfir móana, heyra í fuglunum og njóta langra daga. Þessi mynd er tekin kl. 21.30 !

Reyndar þarf maður heldur betur að borga fyrir dásemdirnar en hvernig er hægt að standast til dæmis þessi egg ?

 Svo flottar umbúðir og eggin langt frá því að vera slétt og felld líkt og þau sem eru frá risahænsnabúunum.

Og að sjálfsögðu var heklið ekki langt undan í hvíldinni. Hlakka til þegar þessi hekltilraun fer að verða endanleg.