27. desember 2014

Gleðilega hátíð

Þó að engin sjáist sjáist sól
samt ei biturt gráttu.
Nú skal halda heilög jól,
hugga slíkt þig láttu.
- Jól í koti, jól í borg,
jól um húmið svarta,
jól í gleði, jól í sorg
jól í hverju hjarta.
B. Þ. Gröndal

 

14. desember 2014

Á aðventu

Ég er búin að vera að stússast sitt lítið af hverju síðustu daga. Eitt kvöldið, svona þegar ég var að bursta tennurnar fyrir svefninn, fékk ég hugmynd. Ég varð að búa til "mandölu" eins og Lucy í Attic24 var að gera í sumar. En hvað hef ég við enn einn pottaleppinn að gera? Júbb, hann skyldi vera botninn á innkaupatuðru. Sem sagt, verkefni sem er í poka í töskunni sem fer með um allt. Ágætt t.d. þegar ég bíð eftir Litlamann á sundæfingu og á kaffistofunni í vinnunni.

Nema hvað. Þá vantar mig meira garn og þá dró ég fram fínu, flottu garnvinduna mína sem Húsbóndinn gaf mér óvænt í síðasta mánuði. Besta gjöf sem ég hef fengið lengi.
Nú svo eru það smáfuglarnir. Mér finnst svo yndislegt að fylgjast með þeim út um eldhúsgluggann þegar ég er að vinna eldhússtörfin. Ég hef keypt poka með fuglafóðri en bætt svo við niðurskornum brauðendum, eplum eða mylsnunni úr botninum á cornfleksinu. Svo er voða vinsælt hjá fuglunum að bæta við svolítilli fitu til dæmis þeirri sem kemur þegar maður steikir kjöt. Fuglarnir sem koma við hjá mér eru starrar, þrestir og snjótittlingar.
Hér á þessu heimili er ekki hefð fyrir því að standa á haus í bakstri á aðventu. Ég hef þó alltaf bakað einu sinni á aðventu piparkökur, svona meira fyrir börnin gert. Og þetta hefur alltaf verið skemmtilegt. Þetta árið var það bara Litlimann sem hafði áhuga á að taka þátt en skemmtilegast fannst honum uppvaskið.
Og þennan þriðja sunnudag í aðventu sitjum við Litlimann saman með barnaefnið í sjónvarpinu í bakgrunni meðan aðrir fjölskyldumeðlimir kúra undir sæng.
Hann að kljást við púsluspil frá jólasveininum og ég að hekla snjókorn. Yndislegt.
 

 

 

 

 

 

4. desember 2014

Endurvinnsla

Eftir vinnu á föstudögum kem ég stundum við í nytjamarkaðinum. Litlimann fær hundraðkall og má velja sér eitthvað í krakkahorninu á meðan ég vafra um og skoða draslið dótið sem fólk telur sig ekki þurfa lengur. Fyrir síðustu helgi var opnaður sérstakur jólanytjamarkaður og þar voru þessar fallegu bláu jólakúlur. Ég tók þær upp og þá kom í ljós þessi undarlega bílaframleiðenda merking. Úr búðinni fór ég tómhent en um helgina læddist að mér hugmynd...

 

...og eftir vinnu á mánudag nældi ég mér í einn kassa, takk fyrir pent. Og hafðist handa...

 

 

Uppskriftina má finna í Maríu heklbók en ég þurfti aðeins að breyta henni því að ég náði ekki að þekja kúluna með góðu móti. Húsbóndanum fannst þetta pínulítil geggjun en bað mig um að halda einni kúlunni naktri því hann var alveg meira en til að skreyta með merki volkswagen.

 

 

 

 

3. nóvember 2014

Svart og hvítt

Hefur þú einhvern tímann prjónað úr svörtu garni? Jæks, það er eins og að vinna með kolsvarta nóttina. Og svo að taka mynd af því, varla hægt nema fyrir pro.

Annars eru þetta legghlífar á ballerínuna og frumburðinn. Hún var að drepast úr kulda í einhverjum sal sem hún æfir í einu sinni í viku og vantaði eitthvað til að halda á sér hita.

Hérna er hún fyrir miðri mynd:

Maður veltir óneitanlega fyrir sér hvaðan hún hefur þennan tígulleik...

ég meina, hér sjáið þið þokkann hjá undirritaðri ...

 

 

19. október 2014

Vetrarfrí

 

 

Jey smá vetrarfrí. Við brugðum okkur upp í bústað eina nótt. Hefði gjarnan viljað vera aðeins lengur en nóg að gera heima. Það var líka svolítil gosmengun svo að það var ekki gáfulegt að vera mikið úti.

Það er samt alltaf hægt að finna sér eitthvað að gera, sívinsælt að moka holu eða fylla í holu :)

 

En það þarf alltaf að vera viss um að Litlimann hafi nóg fyrir stafni. Keypti lítinn vefstól handa honum og hann var virkilega áhugasamur og vildi endilega hafa hann með sér heim.

Best samt leiðbeiningarnar á kassanum; og regla nr.1 gríðarlega mikilvæg ;)

 

15. október 2014

Hversdags...

Heimanám hjá Litla mann og sunddrottningunni unnið við eldhúsborðið. Ég aftur á móti bæti við pilsið góða nýrri heklaðri dúllu. Pilsið er notað 1x á ári sem auðvitað er bölvuð vitleysa. Þörf á að minna á mikilvægi skimunar og eftirfylni gagnvart krabbameini alla daga ársins.

 

7. október 2014

Vettlingar

Ég er hér enn, gasalega mikið að gera svona eins og oft vill verða. En langaði að birta mynd af vettlingunum úr leyni-samprjóninu. Ég náði ekki að halda í við hina prjónarana, á Raverly var búið að birta yfir 200 myndir af svona vettlingapörum 1. október. Mínir vettlingar eru helst til of stórir á mig en það má örugglega finna hendur sem geta notað þá.

 

7. september 2014

Leyni-samprjón

Er í fyrsta skipti að taka þátt í leyni-samprjóni í gegnum Ravelry. Skemmtilegir, spennandi og krefjandi vettlingar. Næ vonandi að halda í við hina prjónarana, en, hey, allt bara til gamans gert.

 

16. ágúst 2014

Kvakamóle


Eitthvað verður nú að fara að skoða matarræðið á þessum bæ og gæta betur að heilsunni. Sjáum nú til hvernig það mun ganga ;)




9. ágúst 2014

Ívaf






"Orðið er mjög íslenskt og vísar í aldagamla þekkingu sem var mikilvæg fyrir afkomu okkar, vefnaðinn eða þann þráð, ívafsþráðinn, sem myndar bindingu við uppistöðuþræðina í vefstólnum þannig að úr verður voð, sem er einn mikilvægasti þátturinn í tilveru manneskjunnar, það að eiga voð í fatnað. Orðið hefur ljóðræna íhlutun og það bindur saman orð, stemmningu eða merkingu og myndar heildræna sýn, eins og t.d…. með léttu ívafi, ….blandað ívafi, ….. matur með indversku ívafi, …… með Harry Potter ívafi o.s.frv. Það lætur lítið yfir sér en myndar stóra samstæða heild í íslensku máli …… með ívafi …. þá þarf ekki að segja meir, það skilst við hvað er átt. Þó segir það kannski ekki alla söguna, það vinnur á, eins og framgangur vefnaðarins, orðið hvetur þannig til skapandi hugsunar, maður þarf að ímynda sér, vefa sinn eigin vef, til að átta sig á niðurstöðunni og þannig er líka orðið, ívaf, ófyrirsjáanlegt."



Það er sérkennilegt hvað það er stundum erfitt að koma frá sér því sem maður vill segja. 
Það reynist enn erfiðara fyrir mig að skrifa hugsanir niður. 
Hvað þá að birta það hér í litla horninu á alheimsvefnum. 



Því er ekki er hægt að neita að sumarið á þessum bæ hefur verið nokkuð strembið. Það er margt sem hefur áhrif. Börnin eru að vaxa úr grasi og taumurinn verður sífellt lengri. 

Prinsessan á bænum fer á næstu dögum til höfuðborgarinnar til að byrja nám í framhaldsskóla og í frekara dansnám. Hún fékk "fullorðinsvinnu" í sumar sem þýðir að hún þarf að standa sína plikt. Það er sko ekkert elsku mamma þar. Hún hefur líka verið að læra á bíl og hún finnur þar, held ég, aukið frelsi. Þá er bara að vona að hún kunni að höndla það og að það sem hún hefur lært í heimahúsum muni fylgja henni í því sem hún tekur sér fyrir hendur.

Miðjubarnið, sunddrottningin, er lika að fullorðnast. Er að komast á fermingaraldurinn. Það er nú ekkert smávegis. Það sem af er þessu ári er hún meira að segja búin að fara út fyrir landsteinana þrisvar sinnum án okkar. Tvær keppnisferðir og ein æfingaferð með sunddeildinni. Eitt landsliðsverkefni í sundi, hvorki meira né minna. Mitt hlutverk er sem áður að fylla á ísskápinn og þvo þvotta. Ég get sko alveg fullvissað ykkur um að hér er þvottavélin mikið notuð þegar æfingarnar hjá henni eru í kringum 12 á viku. Slatti af handkæðum það.



Litlimann er líka að hefja nýjan leikhluta. Hann hætti í leikskólanum í júní og ætlar að byrja í 1. bekk eftir nokkra daga. Elsku litli drengurinn minn orðinn svo stór. Hann er voða spenntur fyrir þessu öllu saman en á sama tíma skilur hann (skiljanlega) ekki þetta alveg. Að fara einn í skólann. Passa upp á dótið sitt sjálfur. Eignast nýja vini með gleði og sorgum sem fylgir vináttu.

Hvar stend ég svo? Nú er nýtt skólaár að hefjast í kennslu. Hvaða breytingar verða? Af gefinni reynslu er hvert skólaár sérstakt. Nýjir nemendur, nýjir samstarfsmenn og nýtt umhverfi sem er sífellt að breytast. Það sem þótti ágætt í gær er ekki endilega það besta á morgun.


Þannig er nú það. Breytingar. 

Ívaf...

...orðið hvetur þannig til skapandi hugsunar, maður þarf að ímynda sér, vefa sinn eigin vef, til að átta sig á niðurstöðunni og þannig er líka orðið, ívaf, ófyrirsjáanlegt."

                                                                      Fegursta orðið

23. júlí 2014

Gluggaveður


Því miður er veðrið ekki að lagast, enn blautt og svakalega þungbúið alla daga. Þessa fáu stundir sem hefur stytt upp hef ég þó farið í stuttar ferðir og verið komin heim aftur fyrir kvöldmat. Á safnadaginn fórum við mamma og Litlimann út í Gróttu og skoðuðum Nesstofu. Það var áhugavert að skoða og Litlimann hafði gaman af smáverkefnum sem Þjóðminjasafnið hefur útbúið fyrir yngstu gestina.




Annan dag fórum við í Álafosskvosina. Við gengum um og Litlimann naut sín svolitla stund í leiktækjum og síðan fórum við og fengum okkur að borða á kaffihúsinu í Kvosinni.  
Sniðugt var að á boðstólnum var mjög góður ofnbakaður fiskur þar en við borðuðum  á Tveir vitar í Garðinum nokkrum dögum seinna og þar var líka boðið upp á fisk. Ég vona bara að þetta verði meira stefnan á íslenskum veitingastöðum, að þeir bjóði upp á góðan fisk. Ég meina það er verið að kvarta undan skorti á nautakjöti, því ekki þá að bjóða upp á fisk sem við eigum nóg af. Ennþá.






Annars eru dagarnir fljótir að líða, það er nóg að gera hér heima svona eins og að taka til í geymslunni. Almenn heimilisstörf eru líka þarna, ekkert sumarfrí með það.

Prinsessan fékk vinnu í frystihúsi í Garðinum svo að það er nóg að gera að koma henni til og frá vinnu. Hún hefur verið að mæta suma morgna fyrir kl. 6.00 og koma heim um miðnætti. Þá er ekki um neitt annað að ræða en að skutla henni.
Þetta hefur í för með sér að það er hægt að fá smá frið við handavinnuna á furðulegustu tímum.

miðvikudagur kl. 06.00


Prjónaskapurinn hefur líka náð nýjum hæðum ;)
Sumir eru að prjóna borðtuskur en ég ...


....prjóna utan um golfkylfur.
Jebb, alveg orðin klikk ;)

19. júlí 2014

Allt í köku


Í áframhaldandi rigningartíð erum við Litlimann búin að baka endalaust af kökum. Sunddrottningin er einnig orðin vel liðtæk í eldhúsinu en hún er núna í tveggja vikna sumarfríi frá sundi og gerir því lítið annað þessa dagana en að borða og sofa.
Ef þig langar til að skella í möffins þá klikkar þessi uppskrift seint:


Jógúrt möffins

150 gr smjörlíki
2 bollar sykur
3 egg
2 1/2 bolli hveiti
1/2 tsk matarsóti
1/2 tsk salt
1 tsk vanilludropar
1 dós kaffijógúrt - tæpir tveir desilítrar ef þig langar til að prófa einhverja aðra tegund, sem virkar alveg jafnvel.
100 gr súkkulaðispænir 

Hitið ofninn í 200°c 
Gott að hræra fyrst saman smjörlíki, sykur og egg svolitla stund 
Bætið restinni út í og hrærið vel
Ég set að lokum súkkulaðið varlega saman við með sleif. Það er líka hægt að skipta út súkkulaði og setja hnetur eða frosin ber, bara svona eftir því hvað er til í skápunum ;)

Bakið í ca. 15 mínútur - allt eftir því hversu mikið er í hverju möffinsformi.

Uppskrift dugar í uþb. 22 muffins

Verði ykkur að góðu