Haust

Haustið er komið, allt komið í rútínu og þá er gott að hafa handavinnuna.

Ég hef líka verið aðeins verið að leika með pappír og málningu.

Þar til næst

XXX

 

 

 

Posted with Blogsy

Vetrarfrí

 

 

Jey smá vetrarfrí. Við brugðum okkur upp í bústað eina nótt. Hefði gjarnan viljað vera aðeins lengur en nóg að gera heima. Það var líka svolítil gosmengun svo að það var ekki gáfulegt að vera mikið úti.

Það er samt alltaf hægt að finna sér eitthvað að gera, sívinsælt að moka holu eða fylla í holu :)

 

En það þarf alltaf að vera viss um að Litlimann hafi nóg fyrir stafni. Keypti lítinn vefstól handa honum og hann var virkilega áhugasamur og vildi endilega hafa hann með sér heim.

Best samt leiðbeiningarnar á kassanum; og regla nr.1 gríðarlega mikilvæg ;)

 

Posted with Blogsy

...og enn fleiri húfur

Það virðist eins og allir í kringum mig séu að búa sig undir harðan vetur  - Lóa mín, þú fært tækifæri til að nota nýju úlpuna þína ;)  Haustið ætlar að vera stutt þetta árið, ég hugleiddi einn morguninn í vikunni hvar rúðuskafan fyrir bílinn væri því að það virtist vera hrím á bílrúðunum.
Ég er nú frekar róleg yfir þessu, planið að vera bara inni og prjóna/hekla ef að veðrið verður slæmt.
Það verður að minnsta kosti engum kalt á skallanum sem ég þekki því að ég var að ljúka við enn eina húfuna úr Húfubókinni góðu...

Svo verð ég að deila með ykkur nýjasta æðinu á þessu heimili, Hjálparsveins-vettlingar. Tengdó prjónar vettlinginn en ég hekla augun og sauma munn. Ekki annað hægt en að brosa að þessum.

Haust

Það er komið haust. Lítið annað hægt að segja um það en ef þig langar til að hekla utan um krukku þá má finna uppáhalds uppskriftina mína hér.

Aftur í skólann

Nú er skólinn byrjaður eftir sumarfrí og þá er mikilvægt að hafa skopparahúfu við hæfi.

Prinsessan ætlaði nú sjálf að prjóna húfuna og byrjaði á stroffinu. Ég sá fram á að húfan yrði aldrei kláruð þegar komið var að munstrinu svo að ég tók við. Ég átti sjálf fullt í fangi með munstrið fyrst en eftir að hafa skoðað útfærslur á því á youtube ("star knit") komst ég upp á lag með það.

Uppskriftin er úr fallegri bók Húfuprjón eftir Guðrúnu S. Magnúsdóttur.

Garnið er 100% merinoull frá Rauma

Er þetta ekki bara vinalegur staður ?

Flúðir september 2012

Ég var að horfa á imbann og þar var verið að ræða við eldri mann. Einn af þessum sem er að gera eitthvað af hugsjón einni saman. Þessi höfðingi var að græða landið sitt, Ísland.

Lengst uppi á öræfum.

Flúðir september 2012

Fréttamaðurinn spurði: "Hvers vegna hérna? Af hverju að græða landið hér? " 

Hólaskjól september 2012

Og svarið kom svo:  "Er þetta ekki bara vinalegur staður?"

Dverghamrar september 2012

Úff, já. Er það ekki bara málið á Íslandi? Það er alveg sama hvar við drepum niður fæti, þar er vinalegt. Lengst uppi á öræfum, niður í fjöru, sveitinni okkar eða í gleðskap með fjölskyldu/vinum. 

Vík í Mýrdal september 2012

Vinalegt

Kría

Nú er haustið komið, skólarnir byrjaðir og farfuglar að búast til ferðalaga. Hér á bæ hefur verið nóg að gera í almennu heimilishaldi og að loknum vinnudegi er engin löngun orka í handavinnu. Þá er nú gott að hafa sjónvarpsdagskrá sem skilur ekkert eftir og reynir ekkert á heilann...

... en lengi er von á góðu.

Sjalið Kría

Uppskriftin er úr Heklbók Þóru. Umferðirnar urðu 57.  Ég breytti aðeins uppskriftinni því að þegar ég var komin með ca. 20 umferðir fannst mér "grunnlínan" aðeins of stíf svo að ég gerði síðasta stuðulinn í umferð tvöfaldan (tvíbrugðinn stuðull). Garnið er Einband.