Vetrarfríið í hnotskurn

Smá...

...sveitasæla þegar við náðum að gista eina nótt í bústaðnum, anda að okkur sveitaloftinu og svamla í heita pottinum.

Smá...

...keypt af garni. Ég veit að það var ekki þörf en sko þegar maður á leið framhjá búðinni í sveitinni og maður freistast til að "skjótast aðeins inn" þá labbar maður ekki svo auðveldlega út aftur með tvær hendur tómar (tja, nema þá helst peningalega séð !)

Smá...

...góður maður. Hellingur af góðum mat, fáranlega mikið af góðum mat. RoSaLeGa góður matur. Var ég búin að nefna það að það var gúffað í sig eins og það væru jólin af góðum mat. Tilefnið var reyndar að tengdapabbi átti afmæli um helgina og fórum við á Hótel Sögu til að gera okkur dagamun. Ég mæli hiklaust með hlaðborðinu þar en bara vera viss um að einhver gaur á símanum sem tekur niður borðapantanir hafi alveg á hreinu hvenær veitingastaðurinn opnar. 

Og smá...

...jóla jóla. Ekki svo að skilja að ég sé byrjuð að undirbúa jólin. Neihei. Langt í frá. Ég hef heldur engan áhuga að vera þessi skipulagða sem er búin að redda jólagjöfunum í ágúst og skreyta húsið hátt og lágt fyrsta í aðventu. En ég skrapp aðeins á bókasafnið til að finna eitthvað að lesa og sá þá að starfsfólkið var búið að taka fram jólatímaritin. Æi, það er svo mikil rómantík og yndislegheit að láta sig dreyma.

Vetrarfrí

Kannski...

...verður tími til að drekka kaffið sitt í næði

Kannski...

...verður tími til að leika sér

Kannski...

...verður tími til að lesa

Kannski...

...verður tími til að hekla

Kannski...

...umm, já kannski...

Bleikt

Nú í október er árverknisátak gagnvart krabbameinsleit hjá konum. 

Allir vinnustaðir með á nótunum, allir mæta í einhverju bleiku.

Hér er mín útfærsla.

"twoboobieswitharibbon"

Ný heklbók

Nú er komin ný íslensk heklbók, María heklbók, og ég get ekki séð að hún gefi fyrri bókinni neitt eftir. Ég er ekki viss um að ég geri allt úr bókinni en sumt er bara skyldueign heklara, og það er þessi bók sannarlega.

Í bókinni er uppskrift af kraga eða hálsmeni sem kallast Viktoría. Nokkuð skemmtilegt að búa til en mín Viktoría líkist nú meira drottningunni af Saba.

...og enn fleiri húfur

Það virðist eins og allir í kringum mig séu að búa sig undir harðan vetur  - Lóa mín, þú fært tækifæri til að nota nýju úlpuna þína ;)  Haustið ætlar að vera stutt þetta árið, ég hugleiddi einn morguninn í vikunni hvar rúðuskafan fyrir bílinn væri því að það virtist vera hrím á bílrúðunum.
Ég er nú frekar róleg yfir þessu, planið að vera bara inni og prjóna/hekla ef að veðrið verður slæmt.
Það verður að minnsta kosti engum kalt á skallanum sem ég þekki því að ég var að ljúka við enn eina húfuna úr Húfubókinni góðu...

Svo verð ég að deila með ykkur nýjasta æðinu á þessu heimili, Hjálparsveins-vettlingar. Tengdó prjónar vettlinginn en ég hekla augun og sauma munn. Ekki annað hægt en að brosa að þessum.

Haust

Það er komið haust. Lítið annað hægt að segja um það en ef þig langar til að hekla utan um krukku þá má finna uppáhalds uppskriftina mína hér.

Húfa

Ég er svo hrifin af húfunum í Húfuprjón bókinni að það er bara ekki hægt að hætta. Ég er að klára þá þriðju en smá galli á gjöf Njarðar...ég virðist prjóna voða laust miðað við uppskriftirnar í bókinni því húfurnar ætla að verða í xl stærðum ef ég fer ekki í það að nota minni prjóna eða minnka uppskriftirnar.
Já, ég veit, gera prjónafestuprufur fyrst kemur í veg fyrir þetta. En ég hugsa sem svo að það er ekki svo mikill efniskostnaður í eina húfu....og  tja... ég hlýt að finna einhvern höfuðstóran/súper hárprúðan til að nota húfurnar.

Þessi húfa átti að vera með einhvers konar loftlykkjudúllerí á kollinum sem mér fannst einhvern veginn ekki gera sig svo að ég skellti í staðinn í krullur. Miklu betra.

P.s.  Mig langar til að þakka Þórunni og Óskari fyrir lánið á verðlaunagarðinum fyrir myndatöku. Garðurinn ykkar svo fallegur, og ekki síður í grenjandi rigningu. Takk, æði.