Sjal og grifflur

Sjalið Regnbogi er tilbúið. Annað sjalið sem ég geri eftir þessari uppskrift sem ég fann í Fréttablaðinu en ég held að það sé hægt að nálgast hana hjá Storkinum en það heitir Bláberjarönd - ílöng hyrna.

Nú svo þegar ég var byrjuð á annað borð þá gerði ég grifflur úr garninu líka. Garnið heitir Manos del Uruguay og er 30% silki og 70% merino ull. Klikkað dýrt garn en ef ég finn það aftur þá hika ég ekki við að kaupa meira, ég meina það er æði. Ef þig langar til að skoða meira um þetta garn er falleg heimasíða hér. Uppskriftina að þessu snilldar grifflum má nálgast hér en garnið er keypt hér.

Og auðvitað varð Litlimann að fá grifflur líka, en uppskriftina má nálgast hér.

Regnbogi

Keflavík 21.01.2014

Ég keypti afskaplega fínt silki/ullargarn í NY í desember. Litirnir eru hreinlega allir litir regnbogans og mjög svo yrjótt. Ég ætla að prjóna sjal - engin nýlunda þar - en ég er spennt að sjá útkomuna.

Spariterta

Hér á þessu heimili er að koma hefð á að ég baki tertu sem við gæðum okkur á fyrsta klukkutímanum á nýárinu.

Í ár urðu þær tvær, Hindberja-brownies með súkkulaði og rjómaosti og Chili-súkkulaðitruffluterta.

Uppskriftirnar fann ég í fallegri bók Eldað og bakað í ofninum heima .

Hindberja kökurnar heppnuðust ágætlega en það er ekki hægt að segja að þær séu fallegar.

Chili-súkkulaðitrufflutertubotnarnir voru aftur á móti ekki að gera sig. Í fáum orðum skulum við segja að botnarnir líktust meira grjóthörðu hrökkbrauði heldur en dúnmjúkum súkkulaðibotnum.

En ég gafst ekki upp. Notaði gömlu góðu uppskriftina að súkkulaðibotnum sem ég fékk frá tengdó við upphaf búskapar. Klikkar aldrei.

Svo var ráðist í að gera kremið á milli og ofan á.

Umm, mjög gott. Mæli samt með því að hafa allan heimsins tíma fyrir sér því að það er seinlegt að hræra trufflukrem.

Læt hér fylgja með uppskriftina af botnunum frá tengdó,

Brjáluð súkkulaðikaka:

1 bolli sykur

1 egg

1 1/2 bolli hveiti

1/2 bolli kakó

1 tsk lyftiduft

1 tsk natrón

1/2 tsk salt

2 tsk vanilludropar

1/2 bolli smjörlíki (ca. 50 gr)

1/2 bolli nýmjólk

1/2 bolli mjög heitt vatn

 ______________

Öllu sullað saman, hrært saman í ca. 3 mín.

Bakað í 2 lausbotna tertuformum, þægilegt að hafa smjörpappír á botninum.

Bakað við180° í 25 mín. eða þar til botnarnir eru lausir frá börmunum.

Gott er að smyrja á milli með jarðaberjasultu og nota smjörkrem sem líkar best.

Hneta

Ég heklaði þessa húfu á tveimur kvöldum. Einfalt og fljótgert.

Litlimann sagði að húfan væri eins og hneta, jebs ég held það sé rétt hjá honum.

Uppskriftina má nálgast hér.

Jólin

Eftir að ég kom heim frá USA hefur allt verið á OFUR hraða. Ég komst hreinlega ekki yfir allt og hugga mig við að það sé ekki geranlegt að GERA ALLT. 

Það gáfust þó nokkrar ljúfar stundir 

en þess óska ég þér:

Gleðilega hátíð og megir þú eiga margar ljúfar stundir á komandi ári.

New York

Í byrjun mánaðarins fórum við hjónakornin til NY. Húsbóndinn á slatta af ættingjum búsettum víð og dreif um USA svo að tilgangur ferðarinnar var hálft í hvoru að sýna okkur og sjá þau. Gestrisnin var alveg hreint ótrúleg en við gistum í "TheWestWing" og vorum spillt með dásamlegum mat og aldrei neitt junkfæði á boðstólnum. Neihei, bara allt það besta sem fylkið hefur upp á að bjóða, fisk, kjöt, ávexti, ber og heimabakaðar kökur. Dásamlegt bara.
Ég meina, hér er morgunverðarborðið.

Ég var svo ótrúlega heppin að Joann sem við gistum hjá var búin að fá leyfi fyrir mig að koma með henni í heimsókn í grunnskólana sem hún er stundakennari við. Ég fékk að vera viðstödd kennslustundir og lærði ég svo ótrúlega margt af henni, bæði í skólaheimsókninni og svo fékk ég einkakennslu í notkun ipad og tölvunotkun með nemendum/kennurum. Ég get ekki sýnt ykkur myndir sem ég tók í skólanum vegna persónuverndar en læt eina fylgja sem mér finnst svo lýsandi fyrir að í meginatriðum eru skólar að klást við sömu verkefnin.

Við fórum á ströndina á Long Island, ekki mikið um að vera þar í desember en greinilega ekki erfitt að komast í kyrrð og ró ef áhugi er fyrir hendi.

Við fórum og skoðuðum ys og þys við Times Square...

... og minningarreit um tvíburaturnana. Það var magnað. 

Ef það á að skoða eitthvað áhrifaríkt þá er þetta á topp 10 listanum.

Auðvitað var farið í búðir og þá var 15 mín. reglan höfð í hávegum: Á innan við 15 mínútum skal vera búið að kaupa eitthvað!

En besta búðin sem ég fór í var Purl Soho.

Ég meina það var svo troðið af viðskiptavinum þar að það var beinlínis kjánalegt. En úrvalið af garni maður minn! Blessunarlega var ég búin að setja mér mörk um hvað ég mætti eyða miklu. Þessi búð er bara algjörlega nauðsynlegt fyrir þessa handóðu að heimsækja ;)

Þessi borgarferð var alveg hreint frábær og vonandi verður ekki langt að bíða til næstu utanlandsferðar. 

 Note to add:  Thanks to Charlie+Joann for your hospitality and all your help.

Hopefully we will back soon and you know that you are always welcome to Iceland.

Annasamir dagar

Hér á bæ hefur verið svo mikið að gera að það er engu lagi líkt.

Litlimann átti 5 ára afmæli í nóvember. 

Allar helstu ofurhetjur hans komu úr pökkunum sem vöktu mikla ánægju.

Litla hafmeyjan stóð í ströngu við að setja Íslandsmet í meyjaflokki í sundi. 

Okkur telst til að metin hafi verið samtals níu sem hún setti á fimm vikna tímabili. 

Í byrjun desember fórum við á jóla balletsýningu hjá heimasætunni #1. 

Ég meina hvað er hægt að segja annað en að ég er að rifna af stolti.

Handavinnan hefur verið þarna einhvers staðar á hliðarlínunni. 

Þessi engill varð til eitt kvöldið, svo agnarsmár, varla meira en 5 cm á hæð.

Læt þetta duga í bili en vonandi get ég deilt með ykkur fleiri myndum næstu daga því af nógu er að taka.