Bananabrauð og Döðlubrauð

Ertu komin á fætur kl.8.00 á sunnudagsmorgni? Langar þig til að baka eitthvað einfalt með kafffinu ?
Þá er uppskriftin hér:

Bananabrauð
3 stórir bananar
1 bolli sykur
2 bollar hveiti
1 tsk matarsódi
1 tsk lyftiduft
1 tsk salt
1 egg

Byrjaðu á að stappa banana og blandaðu svo öllu öðru hráefni vel saman við þá með sleif. Því næst hellirðu deiginu í vel smurt, aflangt kökumót. Bakar brauðið við 180°c í 50 mín. eða þar til prjónn sem þú stingur í brauðið kemur hreinn út.


Döðlubrauð

1 1/2 bolli sjóðandi vatn
1 bolli döðlur
1 msk brætt smjör/smjörlíki
1 1/2 bolli sykur
2 1/2 bolli hveiti
1/4 tsk lyftiduft
2 tsk matarsódi
1 tsk vanilludropar
1/2 tsk salt
1 egg

Döðlur brytjaðar og látnar standa í vatninu þar til þær eru linar, smjör sett saman við (sem bráðnar
í vatninu). Settu þurrefnin saman við, hrærðu með sleif, vanilludropar og eggið líka - passaðu bara að deigið sé ekki of heitt þegar eggið fer í þá getur deigið skilið sig.  Hef lent í því þegar ég ætlaði að hræra allt saman á ljóshraða :)
Fínt að hita sér kaffi eða te meðan maður bíður eftir að heita vatnið kólnar með döðlunum.
Bakað í ca. 60 mín. við 180°c eða þar til prjónn sem þú stingur í brauðið kemur hreinn út.

Bæði brauðin eru fín með smjöri og jafnvel ostsneið. Verði þér að góðu.

Rigningarsuddi

Eftir mikinn snjó er komin rigningartíð.  Allur snjór horfinn en sem betur fer farið að lengja daginn svo að myrkrið er ekki eins yfirþyrmandi.

Ég er mest í litlu verkefnunum núna, það er svo gott að fá að sjá afrakstur verka sinna strax. Það eru litlu stundirnar sem telja, það er að segja þegar ég sit yfir sundæfingum litla manns þá er hægt að tengja nokkrar lykkjur eða yfir sjónvarpinu á kvöldin þegar ró færist yfir.

Dúllurnar eru úr þessari bók hérna , frábærar skýringar og myndir. Ég gaf mér svolítinn tíma til að læra á táknin, það margborgar sig.

Íslandsstjakinn er snilldarhönnun, fallegt og óvenjulegt.

Músin er líka handunnin eftir fjarskyldan frænda norðan af landi.

Nemo vettlingar

Ég prjónaði þessa vettlinga sitthvorn sunnudaginn á litla mann. Það er gott lag á þeim og uppskriftin er mjög auðveld.  Nemo vettlingar færðu á Raverly - frítt. :)

Snjór , snjór og meiri snjór

Veðrið hefur ekki verið til útivistar síðustu daga. Þá er bara best að prófa nýjar muffins uppskriftir.

Bollakökur Rikku varð fyrir valinu, Vanillukökur með vanillukremi. "Væmið" sagði húsbóndinn en ég gat nú ekki séð annað en að þær hafi runnið ljúflega niður hjá öllum fjölskyldumeðlimum.

Heklið hefur tekið yfirhöndina.

Þetta teppi heppnaðist ágætlega en það hefði mátt vera svolítið stærra.

Svo var farið í það að hekla utan um krukkur. Heklaði utan um 8 krukkur á aðventunni. Gaf þær allar , gjafir handa kennurunum á leikskóladeildinni hans litla manns og til góðra vina.

Hér er uppskrift að krukkuhlífum sem ég stílfærði aðeins. Lenti nefnilega í vandræðum með að það var allt of vítt að ofan og þræddi þá efst í gegn borða eða bönd sem halda "hlífunum" kyrrum. Notaði m.a. borða af ónýtum gjafapokum sem smellpassa utan um hálsinn á krukkunni. Svo er líka flott að setja litlar perlur á endann á bandinu, perlurnar sóttar í dótakassa dætranna.

Út í bláinn

 

Ég hef nú svo sem ekki setið auðum höndum þó að bloggið sé ekki virkt. En sem sagt, ég lærði að hekla af   þessum gaur . Sat með tölvuna í fanginu 2. dag páska og æfði mig.  Það tók nokkuð mörg stykki þar til ég var sátt...

Ég var fyrst með sætt hvítt glimmergarn en það var alltof gisið. Færði mig svo yfir í bláu litina og endaði svo á að bæta við brúnum lit.

Gaurinn sýnir ekki hvernig kant skyldi gera utan um teppið en ég keypti þessa yndislegu bók og notaði munstur #39.

Svo er bara að finna lítinn prins sem vill nota teppið, kannski þessi hér...

Ungbarnateppi

21.mars 11

Ég hef verið nokkuð iðin við prjónaskapinn eftir áramót . Þetta teppi var ég ekki nema um 2 mánuði að ljúka við. Í uppskriftinni er teppið einlitt en marglitt er toppurinn á tilverunni. Ég er bara nokkuð ánægð með útkomuna. Garnið er ullarblanda og undurmjúkt. Teppið er þegar farið til samkennara, vonandi kemur það að góðum notum.